係你心灰定你個女心灰?你俾個女跳舞目的係咩?
講個故事你聽,我女都係學跳舞嘅,學咗就嚟9年,有一個大姐姐因為跳得唔算好好,樣又唔靚,身型又瘦又矮(跳舞真係要講下外貌,老師有得選就會揀個樣好身型好同跳得好嘅),跳咗幾年都係排後面同企側邊,佢媽咪好多次叫佢放棄去學其他嘢,但佢自己話好鍾意跳舞,唔介意喺後面或側邊,有得上台已經好開心,經過幾年,佢依然係身裁唔高又冇肉,但而家佢已經可以跳獨舞,仲有幫手教初級細個學生。
我女都經歷過懷疑自己冇天份想放棄,但我同老師加埋同學又氹又鼓勵下,佢挑戰自己,成功練到一字馬,又自動自覺練習,有時即使係興趣都要捱下苦,只有不斷要求自己先會有進步。
你女幾歲?小朋友學習係一個一個階段,去到某個時候開咗竅就會進步好多,等到第二個階段又會再有進步。
花旗太太生活在花旗國,留意時差,你問我未必即時答到。