我兩個仔女都係疫情期間染上打機癮,日打夜打,仲花唔少錢去買道具,俾我發現之後開家庭會議,我冇唔俾佢地打,但要花錢的話就有商榷,我同老公講我地觀點,佢地講佢地打機用錢嘅原因,最後佢地都認同唔應該用咁多錢去玩,因為係一個無底洞,今日400聽日800,遊戲不斷更新加道具,只會無止境地花錢,最大問題係佢地未識搵錢,而家我冇阻止兩兄妹打機,佢地兩個晚晚傾點打,有政策略,又會一齊鬧其他玩家鬧遊戲設定(但講粗口就會俾我制止),佢兩個成績幾乎科科A,所以我唔可以用成績做籍口唔俾打機,我自己都玩,又點可以叫佢地唔玩,只係要佢地玩得有分寸,有功課做要做晒先,偏偏我仔功課多,佢話點都要中間玩下放鬆下,我都隻眼開隻眼閉緊。
初初踏入青春期,兩個都惡頂,一言九頂,一係就十問九唔應,老公結論係佢地打緊機咩都聽唔到,於是約法三章,如果唔聽我電話,唔答我問題的話,我會收番兩個手機冇得玩,佢地真係試過俾我同老公收手機三日,咁而家就識做,太平好多,已經唔駛我成日話佢地。
花旗太太生活在花旗國,留意時差,你問我未必即時答到。