本帖最後由 rose-mag 於 24-1-14 15:42 編輯
俾你借鏡,我冇耐前都回帖分享過:
同你一樣,對上一份工做咗18年,已經經歷過好多個上司,做得最耐又最夾嘅一個足足共事6年半,當時個上司好靠我幫佢把關部門內部嘅嘢,佢都好睇我,對我好好,連屋企嘢私人嘢佢都俾意見我,似朋友多過似上司下屬,佢曾經講過好多次,果份工會係佢退休前最後一份,佢想喺果間公司退休,於是有兩次HR搵我叫我申請另一份高兩級嘅工,我都推咗,因為我同上司相處得好好,大家合作無間,冇我幫佢,佢又會亂一排。後來上司辭職,有人之前同我講,我都唔係好信,最後佢走果陣閂埋門同我傾咗好耐,我知道原因,冰封三呎,非一日之寒,好多嘢唔到佢預期,佢上面新上司好惡頂,公司改制,搞到佢人工少咗好多,佢個女又已經大學畢業搵到份穩定嘅工,又唔啱有人搵佢過檔,人工係少咗D,但冇惡頂上司,又冇咁大壓力,佢深思熟慮後決定接受offer,佢表明唔打算帶埋我走,因為新公司俾唔到咁高人工俾我,佢唔想我損失,而且之前咁多年來,我已經有晒唔少人脈,留喺度唔會有人留難到我,我識嘅多過同級甚至高一級嘅人。
如是者,前上司走後,我直接要同果個惡頂上上司做嘢,佢嘢就有得交俾我做,甚至我放假都要等到我放完假要我跟,明明可以叫另外兩個同事做,佢就偏要我做,話我做嘢交帶,但之後有一個高一級嘅位空缺,佢問都冇問過就即時俾咗一個資歷得三年嘅同事,而呢個同事升職後叫做我半個上司(因為我上司係佢上司嘅下屬),我仲要教番佢做嘢!疫情期間,我成日OT都冇claim,公司好多變動,IT外判,我變相成為半個IT去教同事點樣做嘢,久而久之,我覺得壓力好大,最後壓死駱駝果根稻草就係2022年加人工(我入職18年每年都有人工加,最少都2%,最多去到9%),點知果年加1%,一方面話我做得好好,好幫得手,一方面得1%,我寧願佢話公司業績唔好,個個都唔加,點知我實在太多同事同我friend,有唔只一個人同我講佢地加人工加得好好,好到佢地唔信,呢下我覺得好侮辱,當我白痴?定係因為我做得耐,覺得我唔會走?
好啦,老公話唔開心咪搵工囉,不過唔好裸辭,於是我先由內部開始搵,見過好幾份,但D人太驕傲,個個質疑我唔識做嘢,救命,18年同一間公司,雖然某D工序我唔係日日做,但冇可能唔識做,完全係覺得佢地睇唔起我。我唔服氣,唔通自己咁差?於是我開始發CV,亦有recruiters 同head hunts搵我,最初都驚架,疑心自己係唔係咁差,內部冇一份請,點知好快有兩份工搵我,見試去到第三輪,最後埋門一腳唔得,但亦算好彩,佢地開嘅條件好好,請我的話,我就會走,舊年年頭呢兩間公司一間倒閉一間被收購,如果我去到就首當其衝;期間我不停收到面試通知,5個月內見過10份工,最終係6月同一日收到兩個來自同一間公司不同部門嘅offers,我揀咗其中一個較有興趣嘅職位。
7月交辭職信,當時冇人信我做咗18年會走,有較熟同事問我原因,其中一個甚至拉我入會議室同我分析,最終我將份新工嘅公司、職位都講佢知,佢聽完就話:congratulations!佢冇嘢可以sell我留低,因為人工多差不多10%,福利又好D,有新嘢學,同事都諗唔到點解我要留低。
我都有掙扎過,有唔捨得,個個同事都話冇我幫佢地,佢地唔知點算,我安慰番佢地,好快可以請過一個人代替我,最多亂一陣啫。兩個上司其中一個喺我辭職後放大假,我仲懶好人俾多一個星期通知,等佢返嚟交收,點知我last day果日兩個上司都冇返公司,另一個隔離組話同我食welfare lunch嘅冇出現冇電話,我早早返去想最後幫D同事做D緊急嘢,點知發現account 被鎖,食完晏就咩都入唔到,我好明呢D係規距所在,係我自己唔化啫,人走茶涼一直係事實嚟。
樓主,唔駛覺得自己自私,商業機構唔會同你有親,你幾無私又如何?公司唔會養你過世,點都為自己打算,你出力,應有回報,如果回報唔理想,去搵過一份令你開心嘅工;只有一個忠告,要考慮清楚新工是否有前景,是否可以令你有得著,除咗錢之外,有冇新嘢學,是否可以更上一層樓。
我之前份工有好同事,而家個個星期聯絡,因為住得遠,我地都係text message打下電話傾計,仲有兩個前上司,當我搵工時一口答應做referees,18年收獲幾個呢種"朋友"於願足矣。
記得留少少時間俾自己休息,差足電返新工。
花旗太太生活在花旗國,留意時差,你問我未必即時答到。